Қазақстандық Жастардың Видео Ойындарға Əуестігі

Аңдатпа

Видео ойындардың кеңінен таралуы оларды бос уақытты өткізудің негізгі түрлерінің бірі ретінде жастарға әсерін зерттеудің өзектілігін айқындайды. Себебі бұл құбылыс жастардың психоэмоционалдық жай-күйіне, әлеуметтік бейімделуіне және мінез-құлқына елеулі ықпал етеді. Осы зерттеуде Қазақстан жастарының видео ойындарға әуестігі, сондай-ақ ойын әдеттері, демографиялық сипаттамалар, тәуелділік мінез-құлқының формалары және басқа да мінез-құлық аспектілері арасындағы өзара байланыстар мен айырмашылықтар қарастырылады. Зерттеуге 18 бен 35 жас аралығындағы 105 адам (оның ішінде 44 ер адам және 61 әйел) қатысып, онлайн сауалнамаға жауап берді. Негізгі гипотезалар видео ойындарға әуестіктегі жыныстық айырмашылықтар, діни сенімнің ықпалы, сондай-ақ ойын белсенділігінің қаржылық шығындармен және видеойындардың зияндылығын қабылдаумен байланысына қатысты болды. Деректерді талдау сипаттамалық статистика әдістерін, корреляциялық талдауды, Манн-Уитни және Крускал-Уоллис критерийлерін қолдану арқылы жүргізілді. Нәтижелер көрсеткендей, ер адамдар видео ойындарға көбірек әуестеніп, онлайн ойындарға жиі қатысады және ойын процесіне оң көзқарас танытады. Әйелдер әлеуметтік желілерді көбірек пайдаланып, күйзеліс кезінде артық тамақтануға бейімді. Діни сенімі бар респонденттер видео ойындарға аз қызығушылық танытқан. Видео ойындарға қызығушылық деңгейі мен олардың зиян әсерін қабылдау арасындағы айырмашылықтар анықталды. Корреляциялық талдау ойын белсенділігі, қаржылық шығындар және видео ойындарды қабылдау арасындағы байланысты анықтады. Алынған нәтижелер цифрлық мәдениет және тәуелділік мінез-құлқының алдын алу саласындағы болашақ зерттеулер үшін пайдалы болуы мүмкін. Зерттеудің практикалық маңызы жастар арасында ойынға тәуелділіктің және оған байланысты басқа да мәселелердің туындау қаупін азайтуға бағытталған тиімді бағдарламаларды әзірлеуге бұл нәтижелерді қолдану мүмкіндігінде жатыр.